ចំបាប់ជើងឯកថ្នាក់ជាតិ២០២៣៖ ការប្រកួតកីឡាចំបាប់ជ្រើសរើសជើងឯកថ្នាក់ជាតិឆ្នាំ២០២៣ បានបញ្ចប់ទៅដោយជោគជ័យ នៅថ្ងៃទី២១ ខែមករា ឆ្នាំ២០២៤ នៅសាលចំបាប់ ក្នុងបរិវេណពហុកីឡដ្ឋានជាតិអូឡាំពិកក្រោមអធិបតីភាពលោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជាប្រធានកីឡាចំបាប់អាស៊ីអាគ្នេយ៍។
ការប្រកួតយ៉ាងស្វិតស្វាញបានរកឃើញថា សមាគមក្រសួងមហាផ្ទៃ ឈ្នះមេដាយច្រើនជាងគេ សរុប២០ ក្នុងនោះមេដាយមាស៨ ប្រាក់៩ និងសំរឹទ្ធ១៣ ឈរលេខ១ នាំមុខក្លឹបគិរី ដំរីមានរិទ្ធ ឈរលេខ២ មានមេដាយសរុប៣ ក្នុងនោះមាស១ ប្រាក់១ និងសំរឹទ្ធ១។
ក្លឹបយាយព្រីងមានរឹទ្ធ ឈរលេខ៣ មានមេដាយមាស១ និងប្រាក់១ ស្របពេលក្លឹបឬទ្ធិសែន ឈរលេខ៤ មានមេដាយមាស១ លើក្លឹបចំបាប់បារមីមេទ័ពម៉ឺនឯក មានមេដាយមាស១ ឈរលេខ៥។ ក្លឹបប្រយ៉ាបមានរិទ្ធ មានមេដាយប្រាក់១ និងសំរឹទ្ធ១ ឈរលេខ៦ លើក្លឹបឃ្លាំងមឿង ឈរលេខ៧ មានមេដាយប្រាក់២ និងក្លឹបសមាគមខេត្តកណ្តាល មានមេដាយសំរឹទ្ធ១ ឈរលេខ៨។
សូមបញ្ជាក់ថា ការប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ២០២៣ បានចាប់ផ្ដើមដំណើរការពីថ្ងៃទី១៨ ដល់២១ ខែមករា ឆ្នាំ២០២៤ ដោយមានអត្តពលិក និងប្រតិភូ ៩០នាក់មកពី១០ក្លិប និងសមាគម ក្នុងរាជធានី-ខេត្ត៕
