ដើម្បីការងារមនុស្សធម៍ ក្រោមកិច្ចសហការរវាង សហព័ន្ធកីឡាប្រដាល់ Kick Boxing កម្ពុជា ក្រុមហ៊ុន LDST Development និង CBS គ្រោងរៀបចំព្រឹត្តការ ប្រកួតកីឡាប្រដាល់ Kick Boxing សប្បុរសធម៌កម្ពុជា-ជប៉ុន លើកដំបូងនៅប្រទេសកម្ពុជា ដើម្បីកៀរគរថវិកា ជួយដល់កុមារកំព្រាកម្ពុជា ខណៈការប្រកួតនិងប្រព្រឹត្តិទៅថ្ងៃទី១០ ឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក ។
មានប្រសាសន៍ក្នុងសន្និសិទ្ធិសារព័ត័មាន ស្តីពីព្រឹត្តិការណ៍ការប្រកួតកីឡាប្រដាល់ Kick Boxing សប្បុរសធម៌កម្ពុជា-ជប៉ុន នាព្រឹកថ្ងៃទី២៦មេសា ឆ្នាំ២០២៤នេះ ឯកឧត្តម តែម ម៉ឺន ប្រធានកិត្តិយស សហព័ន្ធកីឡាប្រដាល់ Kick Boxing កម្ពុជា បានសម្តែងនូវក្តីរីករាយ ចំពោះការរៀបចំឲ្យមានការប្រកួតនេះ ខណៈសព្វថ្ងៃនេះវិស័យកីឡាប្រដាល់មិនថា ប្រដាល់គុនខ្មែរ និងប្រដាល់ Kick Boxing កំពុងបានទទួលបានគាំទ្រយ៉ាងខ្លាំង ពីសំណាក់ក្រុមហ៊ុនឯកជន ជាពិសេសសម្រាប់ការប្រកួតនាពេលខាងមុខនេះ គឺដើម្បីប្រមូលថវិកា ទៅជួយដល់កុមារកំព្រាកម្ពុជាថែមទៀតផង។
ក្នុងភាពជាដៃគូផ្នែកផ្សព្វផ្សាយ លោក Dave Ulmer នាយកប្រតិបិត្តរបស់ក្រុមហ៊ុន CBS បានបង្ហាញពីការសប្បាយចិត្ត ដែលក្រុមហ៊ុនបានធ្វើការផ្សព្វផ្សាយការប្រកួតបែបលក្ខណៈអន្តជាតិ ក្នុងន័យសប្បុរធម៍នេះ ។ហើយតាមរយៈការផ្សាយផ្ទាល់លើកញ្ជក់ទូរទស្សន៍ CNC លោកសង្ឃឹមថានិងទទួលបាននូវការទស្សនាច្រើនពីប្រជាជនកម្ពុជា ពិសេសរួមគ្នាចូលរួមចំណែកជួយដល់ការងារមនុស្សធម៍ ដូចជាមណ្ឌលកុមារកំព្រានៅកម្ពុជាជាដើម។
ជាផ្នែកមួយដ៍សំខាន់ ដែលបង្កើតឲ្យមានព្រឹត្តការណ៍នេះឡើង លោក មាស វិចិត្រ អគ្គនាយកក្រុមហ៊ុន LDST Development ជាម្ចាស់ឧបត្ថម្ភកម្មវិធីប្រដាល់ Kick Boxing សប្បុរធម៍ កម្ពុជា ជប៉ុន បានឲ្យដឹងថា ដោយសារតែដៃគូសហការរបស់ LDST ជាកីឡាករអាជីពនៅជប៉ុនហើយមានបំណងចង់ជួយកុមារខ្មែរ ជួយវិស័យប្រដាល់នៅកម្ពុជាទើបសម្រេចរួមគ្នាបង្កើតជាការប្រកួតនេះ ។ការប្រកួតនេះ មិនមានការលក់ សំបុត្រឡើយ ប៉ុន្តែនៅច្រកចូលទីលានប្រកួត គណៈកម្មការ នឹងដាក់ប្រអប់សប្បុរសធម៌ ជូនអ្នកគាំទ្រ ដើម្បីឲ្យពួកគាត់ អាចបរិច្ចាគថវិកា តាមចិត្តធម៌របស់ពួកគាត់ សម្រាប់ជួយដល់កុមារកម្ពុជា ដែលកំពុងត្រូវការជំនួយជាចំាបាច់ ។
អគ្គនាយកក្រុមហ៊ុន LDST បានអំពាវនាវដល់មហាជន ពិសេសអ្នកស្រឡាញ់គាំទ្រវិស័យប្រដាល់នៅកម្ពុជា សូមចូលរួមគាំទ្រកម្មវិធីសប្បុរសធម៌ Cambodia-Japan Charity Fight និងជួយឧបត្ថម្ភថវិកាតាមលទ្ធភាពនៅថ្ងៃប្រកួតនោះ ព្រោះថវិកាដែលប្រមូលបាន នឹងប្រគល់ទៅមណ្ឌលកុមារកំព្រា ហើយក្រុមហ៊ុនផ្ទាល់និងបង្កើតឲ្យមានរេញប្រដាល់ហ្វឹកហាត់ដល់ក្មេងៗទាំងនោះដែលមានចិត្តស្រឡាញ់វិស័យកីឡាផងដែរ។
សូមបញ្ជាក់ដែរថា ព្រឹត្តការណ៍ប្រដាល់ឃីកបុកស៊ីង សប្បុរសធម៍កម្ពុជា ជប៉ុន និងធ្វើឡើងនាល្ងាចថ្ងៃទី១០ឧសភា នៅពហុកីឡដ្ឋានជាតិអូឡាំពិកកម្ពុជា ដោយមានគូអន្តរជាតិ កម្ពុជានិង ជប៉ុន ជប៉ុន និង ជប៉ុន កម្ពុជាៗនិងកម្ពុជា ចំនួន៩គូ ដោយមានការផ្សាយបន្តផ្ទាល់លើកញ្ចក់ទូរទស្សន៍ CNC ផងដែរ៕